瑞典超：主場出擊打落水狗 加爾斯乘勢做大蘇_東方日報

今晚瑞典超中游對決，加爾斯主場火併AIK蘇納。加爾斯一向靠主場搵食，今仗必定藉地利搶攻，AIK蘇納入得又失得，隨時出現大手交易，2.5球大盤乃不二之選。（周二凌晨1時開賽）

雙方同處中游，實力不相伯仲，踢咗14輪後，加爾斯只係領先AIK蘇納2分，不過佢哋深明自己「主強客弱」，因此每逢主場出擊都會搏命搶分。加爾斯依家聯賽累積22分，其中16分係來自主場，而所入嘅17球中，有11球喺主場取得，意味住佢哋好識得幾時留、幾時放，預計今場會狂攻AIK蘇納。

AIK近5作客4敗

AIK蘇納今季聯賽已攻入26粒，單係箭頭伊奧尼斯比達斯已有9球進帳，未計今輪賽事，佢哋係聯賽火力第6強球隊，甚至比今場對手加爾斯入多9球，但點解仍落後畀加爾斯，當然係佢哋防守不穩，踢咗14輪竟然失咗30球，失波之多拍得住護級分子，單計近9場聯賽就狂失27粒，全開3球或以上，猶如不設防，加上球隊近5次聯賽作客，亦輸咗4場。既然守不穩，AIK蘇納勢必以攻代守，實多波入，入球大值得捧場。